話說三口八胃童年時曾經口出狂言過將來要成為一位笑容滿面嘅導遊，雖然長大後冇本事去圓呢個夢，讀大學揀科早已離晒題，但紙係包唔住火嘅，我強烈懷疑身體裡面其實蘊藏住啲旅遊大使基因，令我喺呢幾年來情不自禁咁喺各社交平台度分享本澳嘅醫肚好去處；藉此希望本地人或者遊客，唔使再為「喺邊度開餐好？」呢個問題而愁眉深鎖，往後嘅每個星期，我將會喺由澳門旅遊局推行嘅《論區行賞步行路線》度加插美食環節，希望嬰兒們多多支持，鎖定「三口八胃論區行嚐」，一於帶領埋味蕾齊齊遊歷呢個咁可愛嘅小城啦！

打頭陣嘅有呢間途經「爐石塘巷」嘅文記咖啡麵食，位置唔難搵，就喺「新馬路/大豐」巴士站附近，望到典當業展示館轉入去條內街就搵到。文記由幾十年前嘅路邊茶檔做到入鋪，成為街坊們心目中「價格平凡，食物非凡」嘅醫肚勝地。打開心扉推薦嘅話有滿載住鑊氣嘅鯪魚餅炒通粉加太陽蛋、組合離奇但又異常滋味嘅花生雞扒波蘿包同霸氣十足嘅太陽蛋豬扒包！