话说三口八胃童年时曾经口出狂言过将来要成为一位笑容满面慨导游，虽然长大后冇本事去圆呢个梦，读大学拣科早已离晒题，但纸系包唔住火慨，我强烈怀疑身体里面其实蕴藏住啲旅游大使基因，令我喺呢几年来情不自禁咁喺各社交平台度分享本澳慨医肚好去处；借此希望本地人或者游客，唔使再为「喺边度开餐好？」呢个问题而愁眉深锁，往后慨每个星期，我将会喺由澳门旅游局推行慨《论区行赏步行路线》度加插美食环节，希望婴儿们多多支持，锁定「三口八胃论区行尝」，一于带领埋味蕾齐齐游历呢个咁可爱慨小城啦！

打头阵慨有呢间途经「炉石塘巷」慨文记咖啡面食，位置唔难搵，就喺「新马路/大丰」巴士站附近，望到典当业展示馆转入去条内街就搵到。文记由几十年前慨路边茶档做到入铺，成为街坊们心目中「价格平凡，食物非凡」慨医肚胜地。打开心扉推荐慨话有满载住镬气慨鲮鱼饼炒通粉加太阳蛋、组合离奇但又异常滋味慨花生鸡扒波萝包同霸气十足慨太阳蛋猪扒包！